Céard lena mbaineann an taighde?  

Tá sé mar aidhm ag an staidéar seo iniúchadh a dhéanamh ar fheidhmiú agus ar thionchar Chreat na Sraithe Sóisearaí (JCF) in iar-bhunscoileanna in Éirinn.  Mar staidéar fadama, déanfar taithí scoileanna a fhiosrú thar thréimhse ceithre bliana, d’fhonn léiriú a thabhairt ar an gcastacht, na dúshláin agus an rath a bhaineann leis an JCF a chur i bhfeidhm.  Bainimid úsáid as an nath ‘cur i bhfeidhm’ chun léiriú a thabhairt ar an mbéim atá againn ar an gcaoi a bhfuil scoileanna agus múinteoirí ag tuiscint agus ag dearadh cláir na Sraithe Sóisearaí atá oiriúnach dá gcomhthéacs.  Níl feidhmiú céimneach an churaclaim á mheas sa staidéar.  Is é an ról atá ag an taighde spreagúil seo cur ar chumas ár scoileanna agus ár múinteoirí a scéalta a insint faoi bheith ag obair leis an athrú seo sa churaclam agus a dtuairimí maidir leis na deiseanna agus na dúshláin a chruthaítear a bhailiú.  

Cé atá i mbun an staidéir?  

Tá an staidéar seo á dhéanamh ag foireann taighdeoirí neamhspleácha ó Ollscoil Luimnigh. I ndiaidh próiseas iomaíoch tairisceana, choimisiúnaigh an Chomhairle Náisiúnta Curaclaim agus Measúnachta (CNCM) grúpa taighdeoirí in Ollscoil Luimnigh chun tabhairt faoin staidéar modhanna measctha, ilghnéitheach seo ar fheidhmiú agus ar thionchar thabhairt isteach an Chreata don tSraith Shóisearach i scoileanna. Tá réimse leathan taithí taighde ag an bhfoireann i scoileanna agus i suíomhanna oideachais eile.  Áirítear ar an bhfoireann freisin comhairleoirí idirnáisiúnta a bhfuil saineolas acu ar thaighde curaclaim.  Tá tiomantas morálta againn do shaoirse an fhiosrúcháin agus na díospóireachta léinn.  Mar fhoireann taighde, féachaimid le guth a thabhairt do mhúinteoirí, do dhaltaí, agus do phobail scoile, lena n-áirítear tuismitheoirí, faoina dtaithí ar an gcreat nua. Tá an-taithí ag an bhfoireann taighde ar bheith ag obair i scoileanna na hÉireann, agus mar sin tá an cumas acu freagairt do riachtanais agus do chúinsí na scoileanna.   

Cad a bheidh i gceist leis an staidéar?   

Is éard atá sa taighde seo staidéar modhanna measctha, ilghnéitheach.  

Cad is brí le modhanna measctha?

Ciallaíonn modhanna measctha go n-úsáidfear réimse uirlisí taighde éagsúla sa staidéar, lena n-áirítear agallaimh ar líne, agallaimh duine le duine, ceistneoirí, bailiú fianaise dhoiciméadach agus tuairimí.  

Cad is brí le hilghnéitheach?

Ciallaíonn ilghnéitheach go léireofar sa staidéar taithí agus tuairimí daoine éagsúla lena n-áirítear múinteoirí, daltaí, príomhoidí scoile, tuismitheoirí agus ionadaithe an ghrúpa níos leithne de pháirtithe leasmhara oideachais agus é mar aidhm leis raon leathan taithí agus tuairimí a bhailiú ón réimse is leithne rannpháirtithe agus is féidir. 

Tá trí ghné sa taighde:

I ngné a haon, beidh agallaimh le hionadaithe ó chomhlachtaí agus ó ghníomhaireachtaí páirtithe leasmhara ábhartha.  Tá tuairimí an ghrúpa seo á lorg mar gur féidir leo léargais agus dearcthaí uathúla ar an athrú curaclaim a chur ar fáil.   Tá grúpaí atá ionadaíoch ar mhúinteoirí, daltaí, tuismitheoirí agus bainistíocht scoile i gceist anseo.  Cuimsíonn sé freisin príomhchomhlachtaí agus príomhghníomhaireachtaí eile in oideachas na hÉireann. 

Baineann gné a dó le hagallaimh ar líne/theileafóin le 100 príomhoide scoile i mbliain 2, 3 agus 4 den staidéar.  Beidh suirbhé múinteoirí ar líne i gceist leis freisin i measc 100 scoil i mbliain 2 agus 3.  

Baineann gné a trí le cás-staidéir ar 12 scoil a roghnófar as an sampla tosaigh de 100 scoil.  Tabharfar cuairt ar na scoileanna sin faoi dhó, i mbliain 2 agus i mbliain 4 den staidéar.  Áireofar agallaimh (le múinteoirí, daltaí, tuismitheoirí, príomhoidí, ceannairí curaclaim, agus cúntóirí riachtanas speisialta) ar na cuairteanna ar an suíomh seo, anailís ar cháipéisí scoile, suirbhé daltaí agus breathnóireachtaí ranga.  

Trí úsáid a bhaint as an gcineál staidéir seo, beidh sé d’acmhainn ag an staidéar a insint dúinn faoi chur i bhfeidhm an athraithe curaclaim seo sna scoileanna.  Tabharfaidh an staidéar léargas freisin ar chur i gcrích mórathruithe earnála, oideachasúla. 

Cén chaoi a roghnófar scoileanna?  

Tógfar na múinteoirí agus na príomhoidí a ghlacann páirt sa dara gné den staidéar ó shampla randamach srathaithe de 100 scoil a chinnfidh an fhoireann taighde.  

Cad is sampla randamach srathaithe ann?

Ciallaíonn sampla randamach srathaithe go roghnófar scoileanna go randamach ón liosta de bhreis agus 750 iar-bhunscoil, agus léireoidh an sampla sin cion na gcineálacha éagsúla scoileanna in Éirinn freisin.  Ciallaíonn sé sin go mbeidh líon ar leith de chineálacha éagsúla scoileanna inár sampla (i.e. scoileanna pobail, meánscoileanna deonacha, etc.), scoil aonghnéis agus mheasctha, tuaithe agus uirbeach, lán-Ghaeilge agus beidh sé ionadaíoch ar bhonn réigiúnach.   

Tá sé mar aidhm go mbeidh an sampla cás-staidéir de 12 scoil ionadaíoch chomh maith ar na cineálacha éagsúla scoileanna.  Ní bheidh sé indéanta sraith cásanna a roghnú a léiríonn na héagsúlachtaí go léir a d’fhéadfadh a bheith ann maidir le gnéithe spéise.  Dá bhrí sin, agus scoileanna á roghnú againn, déanfaimid cásanna a roghnú ina dtaispeánfar trasghearradh uathúil de ghnéithe comhthéacsúla ar eol go mbíonn tionchar acu ar chleachtais teagaisc agus ar fhoghlaim daltaí.   Soláthróidh na cás-staidéir cur síos luachmhar ar athruithe oideachasúla i gcomhthéacsanna éagsúla agus tabharfaidh siad léargas ar an gcaoi a bhfuil scoileanna aonair ag dul i ngleic le hathrú ar scála mór ar an gcuraclam. Níl sé i gceist ag na cás-staidéir comparáid a dhéanamh idir scoileanna ná breithiúnais a dhéanamh faoina bhfuil an JCF á fheidhmiú ar bhealach “maith” nó “dona”.

Cé leis ar cheart dom dul i dteagmháil má tá ceisteanna agam faoin staidéar?  

Má tá aon cheist agat faoin taighde, is féidir leat ríomhphost a sheoladh chuig: JCFStudy@ul.ie 

Is féidir an t-eolas is déanaí faoin tionscadal a leanúint ar:  @JCFstudyUL